မုဿ္ယဲၯဖဲခီဃီၯဆူ ကႜီဢ္တဲဢ္ကီဿ္အဂ့ဿ္ (နီဿ္မုဿ္ယဲၯဖဲအပူ - ၁၀)

မုဿ္ယဲၯဖဲဒီးယိၯသ့ဢ္တဖဢ္ စံဢ္လီၯသကိး၀ဲဖဲ မဲၯယဲဢ္ထဢ္၀ံၯ ပိာ္ထီဢ္သကိး၀ဲ ထံက်ိ မဲၯယဲဢ္ အံၯ တဆီဘဢ္တဆီန႔ဢ္လီၯ. ဖဲအ၀ဲသ့ဢ္ ဟးထီဢ္တလဿ၀ဲဒဢ္မဲၯယဲဢ္ထဢ္အဆဿကတီဿ္ ယိၯလဿအသးပွဿ္အူတဿ္လိဢ္တဿ္သ့တဖဢ္ ဖွံလီၯတဲာ္၀ဲက်ဲအံၯလဿ ၀ဢ္ဆႈဢ္အခ်ံတဖဢ္ဒီး ပာ္လီၯစ့ဿ္ကီး အတဿ္အူတဿ္သမူတဖဢ္ဖဲန႔ဢ္ ဒ္သိးပွၯဟဲလူၯအီၯသုတန႔ဿ္တဂ့ၯအဂီဿ္ ဒီးပာ္ ပနီဢ္စ့ဿ္ကီး၀ဲဒဢ္လဿ အ၀ဲသ့ဢ္လဲၯမၯန႔ဿ္ပွၯကညီမုဢ္ လဿအလီၯဆီတဂၯအံၯ လဿကီဿ္မုဿ္ ႏုာ္တခီ ဒီးဟဲက့ၯႏုာ္လီၯ၀ဲဒဢ္ဆူယိၯကီဿ္ပူၯလံန႔ဢ္လီၯ. ဒီပုဿ္၀ဲဿ္လဿအအိဢ္ဘဢ္ဖဲမဲၯယဲဢ္ တဖဢ္ ကထံဢ္ဘဢ္၀ဲ ၀ဢ္ဆႈဢ္အခိဢ္မဲထီဢ္၀ဲတနီၯ ဖဲမဲၯယဲဢ္က်ိအကပိာ္ကပၯစ့ဿ္ကီးန႔ဢ္လီၯ. မ့ဿ္လဿအ ၀ဲသ့ဢ္ဘဢ္ဟးယံၯဒီးက်ဲတဂ့ၯအဃိ ကလိလဿက့ၯကတုၯဆူမုဿ္ယုဿ္တဿ္လီဿ္န႔ဢ္ ဘဢ္မံလဿက်ဲ တဘ်ဳးနၯညါန႔ဢ္လီၯ.

တုၯမုဿ္ယဲၯဖဲခီဃီၯ ဃိဢ္လိာ္က်ိပာ္၀ံၯ ႏုာ္လီၯလဿယိၯကီဿ္ပူၯယံၯထီဢ္တစဲးဖိ အဘ့ဢ္အကုအံၯ ကိဿ္မးဒ္မ့ဢ္အူအ့ဢ္အသိးအဃိ၊ ယိၯအခိဢ္အံၯမၯဘူးက့ၯအီၯ တဘူဢ္လဿၯနီတစဲးဘဢ္ န႔ဢ္လီၯမ့မ့ဿ္အကစဿ္တခီ တဘဢ္တဿ္နီတမံၯဘဢ္. အိဢ္ဒဢ္မုာ္မုာ္ဖိဒ္ဆဿကတီဿ္လဿ အပူၯကြံာ္အသိး န႔ဢ္လီၯ.
ဒိ၀ဲလဿထါဒီးစံး၀ဲ -
ခီဃီၯဆူယိၯဖိကီဿ္သီ
သူးသ့ဢ္ဟဲက့ၯထီဢ္ကဒီး
ခီဃီၯဆူယိၯဖိကီဿ္ပူၯ
ကိဿ္ဒ္မ့ဢ္သုတမၯဘူး.

မုဿ္ယဲၯဖဲအံၯကိဿ္ဒိဢ္ဒိဢ္ကလဲာ္ ဒ္မ့ဢ္အူအ့ဢ္အသိးအဃိ၊ ယိၯသ့ဢ္တဖဢ္မၯဘူးက့ၯအီၯတဘူဢ္ လဿၯဘဢ္ ဒီးဆိမိဢ္က့ၯ၀ဲ တဘဢ္လဿၯစ့ဿ္ကီးဘဢ္န႔ဢ္လီၯ. မ့မ့ဿ္တခီဆိကမိဢ္ပ်ံၯလီၯက့ၯအသး ခီဖ်ိလဿမ့ဿ္အမၯကမဢ္ဘဢ္ မုဿ္ယဲၯဖဲအဃိ အဂ့ဿ္ဧါန႔ဢ္လီၯ. အ၀ဲသ့ဢ္က့ၯထီဢ္၀ဲဒဢ္ကစဿဿ္ တဆီဘဢ္တဆီ ထီဢ္ဘးလဿမုဿ္ယုဿ္ကစဿဿ္ဖးဒိဢ္ အလီဿ္ထီဢ္ထီန႔ဢ္ဒီး မုဿ္ယဲၯဖဲကြဿ္လီၯကဒါ က့ၯ တဿ္ဆူအလီဿ္ခံ ဒီးထံဢ္ထြဲမုဿ္လီၯႏုာ္အတဿ္ကျပဳဿ္ထီဢ္ ဒီးတဿ္သယုဿ္သညိဘဢ္အီၯလဿ အမိဿ္အပဿ္ အတံၯသကိး အဒိဢ္အအါ အတဿ္အဲဢ္တီစီၯလဿ္ လဿအအဲဢ္ဘဢ္၀ဲဒိဢ္မး လဿသး သမူတံၯသကိး အဂီဿ္ဒိဢ္ဒိဢ္ကလဲာ္န႔ဢ္လီၯ.

မုဿ္ယဲၯဖဲဆ့ဢ္နီၯဆွိလီၯအခိဢ္ လဿသ့ဢ္ဖိအခီဢ္ထံး ဖဲကလံၯဖိဟဲထီဢ္၀ဲကဖီကဖီ ဒီးအ မဲာ္ထံဖိ တဖဢ္ဟဲစႈဢ္ထီဢ္၀ဲကယီကယီ ဒီးယြၯလီၯ၀ဲ လဿအမဲာ္ဘိးပၯဖိအလိၯ ဖဲတဿ္သယုဿ္ဘဢ္က့ၯ ပွၯလဿအအဲဢ္ဘဢ္၀ဲတဖဢ္ လဿလီဿ္စီၯစုၯဖဲအအိဢ္ လဿပွၯကလုာ္ဂၯတဖဢ္အစုတီၯဖီလာ္န႔ဢ္ လီၯ. တဿ္လီဿ္ဖဲန႔ဢ္ လဿအခီဢ္ထံးပွၯကိးအီၯလဿ မုဿ္သယုဿ္ ဘဢ္ဆဢ္လဿခံပွၯကိးတဿ္လဲ လိာ္ ၀ဲအဃိ၊ ပွၯကိးအီၯလဿ မုဿ္ယုဿ္ ဒီးတနီၯကိးစ့ဿ္ကီး၀ဲလဿ မုဿ္ယူဿ္န႔ဢ္လီၯ. တဿ္န႔ဢ္၀ံၯအလီဿ္ခံ အ၀ဲသ့ဢ္ဟဲက့ၯပိ္ာ္လီၯ၀ဲကစဿဿ္ဖးဒိဢ္တဆီဘဢ္တဆီ တုၯလဿမုဿ္ယုဿ္တဿ္ပဿၯခိဢ္ ဒီးဆီလီၯ ကဒီးအလီဿ္ အက်ဲ အိဢ္ဘွံးအိဢ္သါဒီး မံသကိး ၀ဲဒဢ္ဖဲန႔ဢ္ တသီခံသီ၀ံၯ ဟးထီဢ္ကဒီး ၀ဲဖဲ မုဿ္ယုဿ္ဆူ၀့ဿ္ကံဿ္မဲ အဂီဿ္ န႔ဢ္လီၯ. မုဿ္ယဲၯဖဲတခ်ဳးလဲၯတုၯဒံးကံဿ္မဲအခါ ပွၯယိၯဖိအထံအကီဿ္ လဿအအိဢ္ဖဲကီဿ္ကႜီဢ္တဲဢ္ပူၯ တဖဢ္နဿ္ဟူဘဢ္၀ဲအကစီဢ္ ဆဿထံဢ္ဘဢ္မးအီၯဒိဢ္ဒိဢ္ကလဲာ္ ဒီးအိဢ္ခိး လီၯ၀ဲဒဢ္ အခိဢ္လဿတဿ္သူဢ္ဖွံသးညီအပူၯန႔ဢ္လီၯ. မုဿ္ယဲၯဖဲလဲၯတုၯဆူ၀့ဿ္ကံဿ္မဲ တဘ်ီဃီ ယိၯစီၯပၯယဲဿ္ဂၯတဂၯလဿအမံၯမ့ဿ္ဖါကႜဴးလါကႜီ အံၯ အိဢ္ခိးလီၯအခိဢ္ဃုာ္ဒီး ပွၯထံ ဖိကီဿ္ဖိတဖဢ္ဂီဿ္မုဿ္ လဿပွဲၯ၀ဲဒီးတဿ္နဿမူ နဿဆွီအထံတဖဢ္န႔ဢ္လီၯ.

ပွၯထံဖိကီဿ္ဖိတဖဢ္ဒ္အဆဿထံဢ္ဘဢ္၀ဲမုဿ္ယဲၯဖဲအသိး တုၯမ့ဿ္အ၀ဲသ့ဢ္ထံဢ္ဘဢ္၀ဲ တဘ်ီဃီ လဿတဿ္သူဢ္ခုသးခုဖးဒိဢ္အပူၯ ကိးသၾတီထီဢ္သကိး၀ဲ နီဿ္ပၯမုဢ္ဟဲက့ၯတုၯလံ၊ နီဿ္ပၯမုဢ္ဟဲ က့ၯတုၯလံ ဒိဢ္ဒိဢ္ကလဲာ္န႔ဢ္လီၯ. မ့မ့ဿ္မုဿ္ယဲၯဖဲတခီ ပွၯဆွဿလိၯအီၯတဘ်ီဃီဆူ စီၯပၯအမဲာ္ ညါဒီးဒုးဆ့ဢ္နီၯအီၯလဿ စီၯပၯလီဿ္ဆ့ဢ္နီၯကပၯ ဖဲစုစ့ဢ္တခီဒ္တဿ္ကတီၯပာ္န႔ဿ္အီၯအသိး န႔ဢ္လီၯ.
ဒိ၀ဲလဿထါဒီးစံး၀ဲ -
တုၯ၀့ဿ္ကံဿ္မဲတဘ်ီဃီ
ခူဖိ၀့ဿ္ဖိကိးသၾတီ
လဿသးခုကိးလဿသးဖွံ
နီဿ္ပၯမုဢ္ဟဲက့ၯတုၯလံ.

မုဿ္ယဲၯဖဲအံၯ တုၯဃီၯလဿယိၯစီၯပၯအိဢ္တဘ်ီဃီ ကိဿ္တံဿ္ဘဢ္စီၯပၯဒိဢ္မးအဃိ၊ စီၯပၯအံၯ မၯဘူး၀ဲတဘူဢ္ဘဢ္ဒီး လဲၯပာ္၀ဲလဿအနီပူၯန႔ဢ္လီၯ. မုဿ္ယဲၯဖဲလဲၯအိဢ္ဘဢ္၀ဲလဿ စီၯပၯအနီပူၯ အံၯအိဢ္ဘဢ္၀ဲဒဢ္မုာ္မုာ္ခုဢ္ခုဢ္ လဿပွဲၯဒီးတဿ္အီဢ္တဿ္အီ ဘဢ္ဆဢ္ခီဖ်ိ တမ့ဿ္ဒ္သိး အလီဿ္အက်ဲ ဘဢ္အဃိ၊ အိဢ္၀ဲတမုာ္ဘဢ္ ထီဘိသ့ဢ္နီဢ္ဘဢ္ဒဢ္ အတဿ္အဲဢ္တီစီၯလဿ္န႔ဢ္လီၯ. တဿ္သယုဿ္ တဖဢ္အံၯ ဂုာ္က်ဲးစဿးၾတဴၯကြံာ္၀ဲဒဢ္ဘဢ္ဆဢ္ တန႔ဿ္ဘဢ္ ထီဘိတဿ္အိဢ္သးတဖဢ္ ဟဲဆီဢ္သ နံးအီၯနးဒိဢ္မးအဃိ လဿနံၯဒီးနၯအတဿ္လဲၯခီဖ်ိတဖဢ္ မုဿ္ယဲၯဖဲအံၯဘဢ္လီၯယြၯဒဢ္လဿ တဿ္မဲာ္ထံမဲာ္နိအက်ါ ဖဲဘူးတံဿ္ပုဿ္၀ဲဿ္ ဒီးပွၯလဿအအဲဢ္ဘဢ္အီၯတဂၯ တသ့ဢ္ညါထြဲလဿၯ၀ဲဘဢ္ န႔ဢ္လီၯ.
ဒိ၀ဲလဿထါဒီးစံး၀ဲ -
အိဢ္တဘဢ္အလီဿ္အက်ဲ
မုဿ္ယဲၯဖဲဆိမိဢ္တဿ္ဘ်ဲး
အိဢ္တဘဢ္ဒ္အလီဿ္လီဿ္
သးသယုဿ္အလီဿ္ဆ့ဢ္နီၯ
အိဢ္တဘဢ္အလီဿ္လဿညါ
သယုဿ္ထီဢ္ဘဢ္စီတခြါ
အိဢ္တဘဢ္အလီဿ္လဿပ်ဿၯ
သယုဿ္ဘဢ္တခြါမိဿ္စဿၯ.

မုဿ္ယဲၯဖဲအံၯ အိဢ္လဿယိၯစီၯပၯအစုပူၯယံာ္လံဘဢ္ဆဢ္ စီၯပၯအံၯ မၯဘူးအီၯတဘူဢ္ဘဢ္ အဃိ၊ တဿ္ကီဘဢ္အီၯဒိဢ္မးဘဢ္ဆဢ္ မၯ၀ဲတသ့နီတမံၯဘဢ္န႔ဢ္လီၯ. ယိၯစီၯပၯအံၯ ခီဖ်ိဆိမိဢ္ ၀ဲတဘဢ္လဿၯဘဢ္အဃိ၊ မဿအပ်ဲဿ္တဖဢ္လဲၯဒြးကြဿ္၀ဲဒဢ္လဿ ၀ံမီဒူ ဒီး၀ံစံးဘဢ္အီၯ၊ ပိာ္မုဢ္အံၯ ခီဖ်ိဟဲက့ၯခီဘဢ္ ဃိဢ္လိာ္က်ိ ဒီးႏုာ္လီၯဘဢ္ဆူ ကီဿ္အဂၯတဘ့ဢ္ တကးဘဢ္ ဟးယံၯဒီး အတဿ္ အိဢ္တဿ္ဆိးအလီဿ္အဃိ၊ ကိဿ္ထီဢ္၀ဲဒဢ္န႔ဢ္လီၯ. ဒ္သိးကခုဢ္လီၯ၀ဲဒဢ္အဂီဿ္ န႔ဢ္ သုကဘဢ္လဲၯ ဟံးန႔ဿ္ နံဢ္သိသူအထံတဖဢ္ လဿအတဿ္အိဢ္တဿ္ဆိးအလီဿ္လဿဖ်းခိဢ္၀ံၯ ဟဲက့ၯဖူလီၯအီၯဖဲ အမံဘဢ္အသးအခါန႔ဢ္ ကခုဢ္လီၯက့ၯ၀ဲဒဢ္တဘ်ီဃီန႔ဢ္လီၯ. ယိၯစီၯပၯအံၯ တဘ်ီဃီ မဿလီၯ အခ့အပွၯစွၯဂၯလဲၯဟံးန႔ဿ္ကဒီးနံဢ္သိသူအထံလဿဖ်းခိဢ္န႔ဢ္လီၯ. ယိၯစီၯပၯအပ်ဲဿ္အံၯ ဒ္စီၯပၯ မဿလီၯအီၯအသိး ပိာ္ထီဢ္လိာ္အခံတဂၯခံဂၯ ဒီးလဲၯ၀ဲဒ္ ပွၯလဲၯ၀ံလဲၯဆါ အသိးဒီး ဟးသံကြဿ္ ပွ႔ၯ၀ဲနံဢ္သိသူအထံ ဖဲဖ်းခိဢ္ သ၀ီ၀ံၯ ဟဲက့ၯဟ့ဢ္လီၯသိအံၯဆူစီၯပၯအအိဢ္န႔ဢ္လီၯ. ယိၯစီၯပၯ အံၯန႔ဿ္ဘဢ္သိတဘ်ီဃီ အသူဢ္ခုသးခု၀ဲဒိဢ္ဒိဢ္ကလဲာ္ ဒီးပာ္ဃာ္၀ဲလဿအကပၯ ဒ္သိးကဒုးကဲ ထီဢ္မုဿ္ယဲၯဖဲလဿအမါဖိသဢ္အဂီဿ္ န႔ဢ္လီၯ. စီၯပၯအံၯခိးကြဿ္၀ဲဒဢ္ဖဲမုဿ္ယဲၯဖဲ မံဘဢ္အသး အကတီဿ္ ဒီးတနီဢ္သးဘဢ္အဆဿကတီဿ္ ဟံထီဢ္၀ဲနံဢ္သိသူထံအံၯဒီး လဲၯဖူလီၯ၀ဲသိအံၯလဿ မုဿ္ယဲၯဖဲအလိၯ ဖဲအမံဘဢ္အသး လဿလီဿ္မံခိဢ္ အဆဿကတီဿ္န႔ဢ္လီၯ. စီၯပၯအံၯဖူလီၯသိ၀ံၯ က့ၯကဒါက့ၯဆူအလီဿ္မံခိဢ္ ဒီးမံ၀ဲဒဢ္လဿတဿ္သးမုာ္အပူၯန႔ဢ္လီၯ.

မုဿ္ယဲၯဖဲတုၯမ့ဿ္အဖုသ့ဢ္နီဢ္တဘ်ီဃီ သ့ဢ္ညါလီၯအသးလဿ အလိၯအယီဿ္အံၯ လီၯဆီဒိဢ္မး တဒ္သိးလဿအဟဲတုၯအသီခါဘဢ္အဃိ၊ သ့ဢ္ညါ၀ဲဒဢ္လဿယိၯစီၯပၯအံၯကဘဢ္လဲၯဟံးန႔ဿ္ နံဢ္သိထံလဿဖ်းခိဢ္ဒီး ဟဲက့ၯဖူလီၯယၯအံၯန႔ဢ္လီၯ. မုဿ္ယဲၯဖဲသံကြဿ္ယိၯသုးလဿအအိဢ္ခိး အီၯတဖဢ္ တဿ္အံၯသုမၯယၯဒ္လဲဢ္. ယိၯစံးဆဿက့ၯအီၯလဿ ပလဲၯဟံးန႔ဿ္နံဢ္သိထံလဿ နဒ့ ပီၯထံးဒီး ဟဲက့ၯဖူလီၯနၯန႔ဢ္လီၯ. မုဿ္ယဲၯဖဲသ့ဢ္ညါ၀ဲတဿ္ဂ့ဿ္အံၯတဘ်ီဃီ အသးဒိဢ္ထီဢ္ဘဢ္ ယိၯဒီး ဆိဢ္ဃီဢ္၀ဲယိၯသ့ဢ္တဖဢ္ သု၀ဲဒဢ္ယိၯတကလုာ္အံၯ သုမၯယၯအဿအဿသီသီအါထဲ အံၯညါ လီၯဂာ္ဒ္ယအိဢ္ဒုဢ္အိဢ္ဒါဒီးသု အသိးညါန႔ဢ္လီၯ. ခီဖ်ိလဿသုမၯကမဢ္ယၯအဃိ၊ လဿ သုတဿ္အိဢ္မူအပူၯ သုတဘဢ္အီဢ္နံဢ္သိ သူတဖဢ္ လဿအဟဲလဿဖ်းခိဢ္ဘဢ္. တကးဘဢ္နံဢ္ သိသူလဿ ဖ်းခိဢ္အခ်ံတဖ်ဿဢ္ဒဢ္လဲာ္ မ့ဿ္လီၯတဲာ္ဘဢ္လဿယအိဢ္ဆိးဟီဢ္က၀ီၯပူၯဖဲအံၯန႔ဢ္ သုခူသု၀့ဿ္ကလူၯ၊ မ့ဢ္အူကအီဢ္ကြံာ္အီၯ သုကဟးဂူာ္ဟးဂီၯလီၯမုဿ္လီၯဖးဒီး ကဲထီဢ္က့ၯပွၯ ကုဿ္ပွၯဃာ္န႔ဢ္လီၯ.

ဒ္မုဿ္ယဲၯဖဲဆိဢ္ဃီဢ္တ့ဿ္ယိၯတဖဢ္အသိး ယိၯလဿအအိဢ္လဿခူပူၯ၀့ဿ္ပူၯတဖဢ္ တအီဢ္ဒဢ္လဲာ္ နံဢ္သိထံဘဢ္ အ၀ဲသ့ဢ္တဖဢ္အါတက့ဿ္အီဢ္ဒဢ္ပဲအထံတဖဢ္န႔ဢ္လီၯ. မုဿ္ယဲၯဖဲစံးစ့ဿ္ကီး၀ဲဒဢ္ ပွၯကညီမုဢ္တဖဢ္ လ့ၯတက့ၯတဘဢ္အဲဢ္ယိၯခြါဘဢ္ မ့ဿ္အဲဢ္ယိၯခြါန႔ဢ္ မၯအီဢ္တဿ္တအီဢ္ဘဢ္ အီဘဢ္၀ဲဒဢ္ဘဢ္. အတဿ္အိဢ္မူကအိဢ္လဿတဿ္ကိဿ္တဿ္ဂီၯအပူၯ ဒီးကဘဢ္ကြဿ္ဆဿဢ္မဲာ္၀ဲတဿ္ ကီတဿ္ခဲ အကလုာ္ကလုာ္န႔ဢ္လီၯ. ခီဖ်ိလဿယိၯဒီးပွၯကညီမုဢ္အစဿၯန႔ဢ္ ယဆိဢ္လီၯတဲာ္တူာ္ ကြံာ္အီၯ ဖဲယစိၯအံၯလံန႔ဢ္လီၯ. မ့မ့ဿ္ပွၯကညီခြါန႔ဢ္ တလိဢ္ထဲန႔ဢ္ညါဘဢ္ မ့ဿ္အဲဢ္ဘဢ္လိာ္ အသး ဒီးယိၯမုဢ္သနာ္က့ ဖံးတဿ္မၯတဿ္န႔ဢ္ကအီဢ္ဘဢ္အီဘဢ္၀ဲ ဒီးကဲဒိဢ္ကဲထီသ့၀ဲဒဢ္န႔ဢ္လီၯ.

တကးဘဢ္ မုဿ္ယဲၯဖဲအံၯစံးစ့ဿ္ကီး၀ဲဒဢ္လဿ တဿ္လဿယိၯတကလုာ္အံၯန႔ဢ္ခဲအံၯ ဒီးဆူညါ န႔ဢ္ လ့ၯတက့ၯတဘဢ္လဲၯလဿၯ၀ဲဒဢ္ဆူ ယဒူယသ၀ီ ယတဿ္အိဢ္တဿ္ဆိးအလီဿ္လဿၯဘဢ္. ယိၯသ့ဢ္တဖဢ္ မ့ဿ္လဲၯဘဢ္လဿယအိဢ္ဆိးအလီဿ္န႔ဢ္ အဘ့ဢ္ကကိဿ္ကုကသြဲတုၯဒဢ္လဲာ္ ဃုအသရဢ္ လဿကကူစါအီၯ တအိဢ္လဿၯဘဢ္န႔ဢ္လီၯ. နံဢ္သိထံအံၯ လဿပ၀ဲကညီကစဿဿ္ခိဢ္ ဖိအဂီဿ္န႔ဢ္ မ့ဿ္စ့ဿ္ကီးကသံဢ္တကလုာ္လဿတဿ္လိၯကိဿ္အဂီဿ္န႔ဢ္လီၯ. ညီႏုဿ္ဖဲဖိဒံဖိသဢ္တဖဢ္ အလိၯကိဿ္ကုသြဲအဆဿကတီဿ္န႔ဢ္ ပဟံးန႔ဿ္နံဢ္သိထံ ဒီးပုၯလီၯအခိဢ္ထံန႔ဢ္ ခုဢ္လီၯ၀ဲဒဢ္သ့ စ့ဿ္ကီးန႔ဢ္လီၯ.

မုဿ္ယဲၯဖဲအံၯ တုၯအဘ့ဢ္အကုတကိဿ္လဿၯဘဢ္ ခုဢ္လီၯက့ၯတစု ယိၯစီၯပၯဟဲအိဢ္ဘူး၀ဲဒဢ္ ဒီးအီၯဘူဢ္လံအဃိ၊ မၯဖိမၯမါ၀ဲဒဢ္မုဿ္ယဲၯဖဲဒီး ပာ္၀ဲဒဢ္မုဿ္ယဲၯဖဲဒ္ သိးအမါဖိသဢ္တဂၯအသိး န႔ဢ္လီၯ. စီၯပၯအံၯ အမါသးပွဿ္အိဢ္ဒီးအီၯ ဘူးဘူးတံဿ္တံဿ္ဘဢ္ဆဢ္ အဲဢ္ဒံးအမါဖိသဢ္ တဘ်ဳး ဂၯတခ်ဳးလဿပ်ဲလီၯအပွၯလဲၯဟံးန႔ဿ္မုဿ္ယဲၯဖဲဒံးဘဢ္န႔ဢ္လီၯ. စီၯပၯအံၯအမါသးပွဿ္ဒီးအမါဖိ သဢ္ခဲလဿာ္ အိဢ္အဂၯသဿဆံဃဢ္ဃဢ္ညါ န႔ဢ္လဿအကစဿ္ဒဢ္၀ဲအတဿ္စံဢ္စိၯတဲစိၯအပူၯ ကြဲးဖ်ါ ထီဢ္၀ဲ ဒဢ္စ့ဿ္ကီးန႔ဢ္လီၯ.

စီၯပၯအံၯအမါသးပွဿ္တဂၯန႔ဢ္မ့ဿ္၀ဲဒဢ္ ပယီၯမုဢ္ကးျပါဒီး မ့ဿ္စ့ဿ္ကီးပွၯလဿအသူဢ္တလိၯသး တဘ်ဿ လဿပွၯအဂၯသ့ဢ္တဖဢ္အဖီခိဢ္န႔ဢ္လီၯ. စီၯပၯအမါအံၯထံဢ္၀ဲဒဢ္လဿ စီၯပၯအံၯ အဲဢ္၀ဲ ဒဢ္မုဿ္ယဲၯဖဲ လဿအမ့ဿ္ပွၯကညီမုဢ္အံၯ ဒိဢ္န႔ဿ္ဒံးအီၯအဃိ၊ အသးတမုာ္ဘဢ္ဒီး သးက့ဢ္၀ဲ ဒဢ္ မုဿ္ယဲၯဖဲအံၯအဿအဿသီသီဒီး ဃုကူဢ္ထီဢ္တဿ္ကူဢ္လဿအအဿတဖဢ္ လဿမုဿ္ယဲၯဖဲအဖီခိဢ္န႔ဢ္ ထီဘိဒီးမဿ၀ဲအပွၯတဖဢ္မၯသံခူသူဢ္ကြံာ္မုဿ္ယဲၯဖဲန႔ဢ္လီၯ.

ဆဿကတီဿ္ယံာ္ထီဢ္ဒီး မုဿ္ယဲၯဖဲအံၯ အိဢ္ထီဢ္အဟုးအသး ဒီးဒဿထီဢ္၀ဲဒဢ္အဖိတဂၯန႔ဢ္လီၯ. ယိၯစီၯပၯအံၯသ့ဢ္ညါ၀ဲဒဢ္လဿ မုဿ္ယဲၯဖဲအံၯအိဢ္ထီဢ္အဟုးအသးအဃိ၊ ယိၯစီၯပၯအံၯမဿ၀ဲ အပွၯတဖဢ္အံးထြဲကြဿ္ထြဲ ၀ဲဒဢ္မုဿ္ယဲၯဖဲ ဂ့ၯဂ့ၯန႔ဢ္လီၯ. မုဿ္ယဲၯဖဲအံၯ အိဢ္ထီဢ္အဖိဆဿကတီဿ္ ယံာ္ထီဢ္ အဟုးဆါထီဢ္ဒီးသ့ဢ္ညါလီၯအသး လဿအဖိကအိဢ္ဖ်ဲဢ္အဃိ၊ မၯပူၯအသးဒီးမဿဟး၀ဲ ပွၯလဿအခိးအီၯတဂၯလဿကလဲၯဆူတဿ္လီဿ္အဂၯန႔ဢ္လီၯ. ဖဲပွၯခိးတဿ္တဂၯဟးထီဢ္ပူၯန႔ဢ္ မုဿ္ ယဲၯဖဲအိဢ္ဖ်ဲဢ္လီၯ၀ဲဒဢ္ အဖိန႔ဢ္လီၯ. မုဿ္ယဲၯဖဲအဖိအိဢ္ဖ်ဲဢ္လီၯတဘ်ီဃီ ဖိသဢ္အံၯတမူ၀ဲဒဢ္ ဘဢ္. မ့မ့ဿ္သံ၀ဲဒဢ္တဘ်ီဃီန႔ဢ္လီၯ. တစိဿ္ဖိပွၯခိးတဿ္တဂၯဟဲက့ၯတုၯ ထံဢ္၀ဲလဿဖိသဢ္အိဢ္ ဖ်ဲဢ္လံဒီး လဲၯဃ့ဿ္တဲဘဢ္စီၯပၯ ဒီးစီၯပၯအံၯဟဲကြဿ္၀ဲဒီး ထံဢ္၀ဲဒဢ္လဿဖိသဢ္အံၯ တမူ၀ဲဘဢ္ အဃိ အသးဒိဢ္ထီဢ္တဿ္ ဒီးဒူ၀ဲပွၯလဿအခိးတဿ္တဂၯန႔ဢ္ အလိၯဆူဢ္ဆူဢ္ကိၯကိၯန႔ဢ္လီၯ. ယိၯစီၯပၯအံၯသံကြဿ္မုဿ္ယဲၯဖဲ မ့ဿ္နမၯဒ္လဲဢ္. ဖိသဢ္အံၯတမူဘဢ္အဂ့ဿ္န႔ဢ္မုဿ္ယဲၯဖဲတဲဆဿ စီၯပၯ ယတသ့ဢ္ညါဘဢ္ ဖိသဢ္အိဢ္ဖ်ဲဢ္လီၯ၀ံၯ ယကြဿ္အီၯတကဲဘဢ္ မ့ဿ္အသံဧါ မ့ဿ္အမူဧါ န႔ဢ္ ယတသ့ဢ္ညါဘဢ္န႔ဢ္လီၯ.

ယိၯစီၯပၯအံၯခီဖ်ိထံဢ္ဘဢ္၀ဲလဿ ဖိသဢ္အံၯ တမူဘဢ္အဃိ၊ အသးဒိဢ္ထီဢ္တဿ္ဒီး ဟးထီဢ္ကြံာ္၀ဲဒဢ္ န႔ဢ္လီၯ. မၯကဒီးတနံဢ္ မုဿ္ယဲၯဖဲအိဢ္ထီဢ္ကဒီးအဖိအသီတဂၯဒီး စီၯပၯအံၯထံဢ္ကဒီး ၀ဲဒဢ္လဿ အမါ ဖိသဢ္ မုဿ္ယဲၯဖဲအံၯ အိဢ္ထီဢ္ကဒီးအဖိ အသီတဂၯအဃိ စံးဘဢ္အကုဿ္အပွၯတဘ်ဳးဂၯဒီး ကိးန႔ဿ္ပွၯသး ပွဿ္လဿ အကြဿ္ပွၯဟုးပွၯသးတဂၯ လဿကဘဢ္အိဢ္ဒဢ္ဖဲ မုဿ္ယဲၯဖဲအကပၯထီဘိ တဘဢ္ဟးဖးလဿ အယံၯလဿၯဘဢ္န႔ဢ္လီၯ. ဘဢ္တနံၯမုဿ္ယဲၯဖဲ အဟုးဆါထီဢ္ကဒီး၀ဲ ဒီးသ့ဢ္ညါလီၯအသးလဿ အဖိကအိဢ္ဖ်ဲဢ္ကဒီးအဃိ ကိးန႔ဿ္ပွၯလဿအခိးအီၯတဂၯဘဢ္တဂၯ ဒီးမဿ၀ဲဒဢ္အတဿ္တဂၯတမံၯ တဂၯတမံၯ လဿအစီၯစုၯဒီးအီၯန႔ဢ္လီၯ. ဖဲပွၯခဲလဿာ္ဟးထီဢ္ပူၯအလီဿ္ခံ ဖိသဢ္အံၯအိဢ္ဖ်ဲဢ္လီၯ၀ဲဒဢ္ တဘ်ီဃီ ဒီးဖိသဢ္အံၯ တမူကဒီး၀ဲဘဢ္န႔ဢ္လီၯ. ပွၯခိးတဿ္တဖဢ္ မၯလဿပွဲၯတဿ္ဒ္မုဿ္ယဲၯဖဲစံးအီၯအသိး ၀ံၯ ဟဲက့ၯ၀ဲဆူမုဿ္ယဲၯဖဲအိဢ္ ဒီးထံဢ္၀ဲဒဢ္လဿ ဖိသဢ္အံၯ အိဢ္ဖ်ဲဢ္တ့ဿ္လံအဃိ၊ ပ်ံၯလီၯအသးဒိဢ္ဒိဢ္ ကလဲာ္ ဒီးလဲၯဃ့ဿ္တဲဘဢ္၀ဲစီၯပၯခ့်သဒံးန႔ဢ္လီၯ. စီၯပၯအံၯတဘ်ီဃီ ဟးထီဢ္လဿအလီဿ္မံပူၯဒီး ဟဲဃီၯ၀ဲဒဢ္ပစုာ္ပတ့ၯ ဒ္သိးကဟံးန႔ဿ္၀ဲဖိသဢ္အံၯန႔ဢ္လီၯ. စီၯပၯအံၯ တုၯဃီၯတဘ်ီဃီ ဟံးထီဢ္ကြဿ္ ၀ဲဖိသဢ္အံၯ ထံဢ္၀ဲဒဢ္လဿ ဖိသဢ္အံၯတဟူးတ၀း ဒီး တကသါ၀ဲအဃိ၊ အသးဒိဢ္ထီဢ္ဒိဢ္ဒိဢ္ကလဲာ္ ဒီးဃါ၀ဲပွၯလဿအခိးတဿ္တဖဢ္အလိၯ ဆူဢ္ဆူဢ္ကိၯကိၯန႔ဢ္လီၯ. မုဿ္ယဲၯဖဲအံၯ သးကညီၯဘဢ္ပွၯလဿ အခိးအီၯတဖဢ္ဒီး အိဢ္ဃူ၀ဲပွၯလဿအခိးအီၯတဖဢ္အခိဢ္ဒီးစံး၀ဲ တဿ္ဒိဢ္စီၯပၯဧဿ၊ အ၀ဲသ့ဢ္ အိဢ္ခိးယၯ ဂ့ၯဂ့ၯကစီဒီန႔ဢ္လီၯ. ခီဖ်ိယမဿအ၀ဲသ့ဢ္စီၯစုၯဒီးယၯအဃိ၊ တဘဢ္ပာ္ဒ့ဢ္ပာ္ကမဢ္ အီၯတဂ့ၯ ယဖိအိဢ္ ဖ်ဲဢ္ ယတသ့ဢ္ညါစ့ဿ္ကီးဘဢ္အဃိ၊ ယမဿဘဢ္အ၀ဲသ့ဢ္ဒီးမၯထြဲ၀ဲယကလုဿ္အဃိ၊ တဘဢ္ဒူအီၯတဂ့ၯ၊ တမ့ဿ္အ၀ဲသ့ဢ္အတဿ္ကမဢ္ဘဢ္ မ့ဿ္ဒဢ္အ၀ဲသ့ဢ္ မၯလဿပွဲၯယတဿ္လိဢ္ဘဢ္တဖဢ္ န႔ဢ္လီၯ. စီၯပၯအံၯ တတဲအါလဿၯတဿ္နီတမံၯဘဢ္ ကဿထီဢ္အခံဒီး ဟးထီဢ္၀ဲဒဢ္ကစုဒုန႔ဢ္လီၯ.

မ့မ့ဿ္စီၯပၯအမါသးပွဿ္တဂၯအံၯ တခီ ဒ္အသးဟ့တ့ဿ္မုဿ္ယဲၯဖဲဒီး ဃုထံဢ္၀ဲအတဿ္ကမဢ္ ဘဢ္ဆဢ္ တထံဢ္န႔ဿ္၀ဲဒဢ္နီတမံၯဘဢ္န႔ဢ္လီၯ. တုၯစီၯပၯအမါသးပွဿ္ တဂၯအံၯ နဿ္ဟူဘဢ္၀ဲ ဒဢ္လဿမုဿ္ယဲၯ ဖဲအံၯ အဖိတမူနီတဂၯဘဢ္အဃိ အသးခု၀ဲဒဢ္ဒိဢ္မး ဒီးထုးထီဢ္အတဿ္ကူဢ္ လဿအကမၯသံကြံာ္၀ဲဒဢ္ မုဿ္ယဲၯ ဖဲအံၯန႔ဢ္လီၯ. စီၯပၯအမါသးပွဿ္အံၯ လဲၯဃီၯဆူ စီၯပၯအအိဢ္ဒီးစံး၀ဲဒဢ္ စီၯပၯဧဿ၊ တဿ္လဿမုဿ္ယဲၯဖဲ တဂၯအံၯ န႔ဢ္ မ့ဿ္ပွၯအနါ တမ့ဿ္ပွၯပွၯအဂ့ၯဘဢ္အဃိ နဘဢ္မၯသံကြံာ္အီၯန႔ဢ္လီၯ. နမ့ဿ္တမၯသံကြံာ္ အီၯန႔ဢ္ တညီဘဢ္ ကကဲထီဢ္တဿ္ကီတဿ္ခဲလဿနထံဖိကီဿ္ဖိအဂီဿ္ ဘဢ္ဖုးန႔ဢ္လီၯ. ခဲအံၯ နထံဢ္ ဒီး နသ့ဢ္ ညါနဲဒဢ္ကစီဒီ န႔ဢ္လီၯ. ဖိသဢ္လဿအအိဢ္ဖ်ဲဢ္လီၯ၀ဲခံဂၯအံၯန႔ဢ္ တအိဢ္မူနီတဂၯဘဢ္ မ့ဿ္ဒဢ္အအီဢ္ကြံာ္ ၀ဲဒဢ္န႔ဢ္လီၯ. နမ့ဿ္တနာ္ယၯနခိးကြဿ္ကြဿ္ကဒီးအသီတဘ်ီ အဖိမ့ဿ္အိဢ္ကဒီး တဂၯန႔ဢ္ တမူကဒီးဘဢ္ ကအီဢ္ကြံာ္ကဒီး၀ဲဒ္အံၯ ကိးဂၯဒဲးန႔ဢ္လီၯ. လဿတဿ္န႔ဢ္အဃိ နတဘဢ္ပာ္အီၯ ဖဲအံၯဘဢ္. နဘဢ္မၯသံ ဆိကြံာ္အီၯန႔ဢ္လီၯ. စီၯပၯအံၯဒ္အမါစံးဘဢ္အီၯအသိး ထံဢ္ဘဢ္စ့ဿ္ကီး၀ဲဒဢ္ ဖိသဢ္အိဢ္ဖ်ဲဢ္တဂၯတမူ ခံဂၯတမူအဃိ၊ ဆိမိဢ္တဿ္ကီဒိဢ္မး လဿအဂီဿ္ ဒီးလဲၯဒြးကြဿ္ကဒီး၀ဲဒဢ္လဿ ၀ံန႔ဢ္လီၯ. စီၯပၯအံၯလဲၯ တုၯ၀ံအိဢ္ ဒီးတဲဘဢ္ ၀ံလဿတဿ္ဂ့ဿ္တဿ္က်ိၯဘဢ္ဃးမုဿ္ယဲၯဖဲ ဒီးဖိသဢ္ အဂ့ဿ္၀ံၯ မဿ၀ံဒြးန႔ဿ္အီၯန႔ဢ္လီၯ. ၀ံဟံးထီဢ္အတဿ္ပီးတဿ္လီတဖဢ္ ဒ္အညီႏုဿ္ဆိးကါ၀ဲဒဢ္ ဖဲအဒြးတဿ္အခါ တဖဢ္ခဲလဿာ္ ဒီး ဒြးကြဿ္၀ဲဒဢ္ တဿ္လဿ စီၯပၯတဲဘဢ္အီၯတဖဢ္အဂ့ဿ္န႔ဢ္လီၯ. ၀ံဒြးတဿ္၀ံၯ ဒ္အတဿ္ဒြးအစဿဟဲထီဢ္၀ဲဒဢ္အသိး စံး၀ဲ စီၯပၯဧဿ၊ တဿ္လဿဖိသဢ္န႔ဢ္ တမ့ဿ္အကစဿ္သံဘဢ္ မ့ဿ္ဒဢ္အမိဿ္တအဲဢ္ဒိး ဒုးကဲထီဢ္အီၯလဿ နၯဒီးအီၯ အစဿၯအဃိန႔ဢ္လီၯ. ၀ံစံးဘဢ္ကဒီးစီၯပၯ၊ လဿအခီဢ္ထံးယတဲတ့ဿ္နၯ တဿ္လဿပိာ္မုဢ္တဂၯအံၯ နကဘဢ္လဲၯဟံးန႔ဿ္အီၯ လဿနကဘဢ္လုဿ္ထီဢ္နထံနကီဿ္ ဒီးမၯဂ့ၯမၯ၀ါထီဢ္ က့ၯနထံနကီဿ္အဂီဿ္န႔ဢ္ လီၯ. တမ့ဿ္လဿနကဘဢ္လဲၯဟံးန႔ဿ္အီၯလဿ နကဘဢ္မၯဖိမၯမါအီၯအဂီဿ္ဘဢ္. ခဲအံၯတဿ္လဿနမၯတ ဖဢ္မ့ဿ္တဿ္လဿ အကမဢ္ခဲလဿာ္န႔ဢ္လီၯ. မုဿ္ယဲၯဖဲ အံၯတသးလီအစဿၯ ခီဖ်ိယိၯသ့ဢ္တဖဢ္ မၯဆူဢ္မၯ ကိၯအီၯ လဿအသးတလီၯပလိာ္ဃုာ္ဘဢ္ အဃိ၊ တအဲဢ္ဒိးပာ္တ့ဿ္ အစဿၯအသြဲဢ္ တဖဢ္ဒီးယိၯစီၯပၯ အံၯအဃိ၊ တခ်ဳးလဿအဒဿထီဢ္ဒံးဘဢ္န႔ဢ္ ဆိဢ္လီၯအသးလဿ အမ့ဿ္အိဢ္ထီဢ္ အဖိဒီးယိၯအံၯ တဂၯ လဿ္လဿ္န႔ဢ္ ကမ့ဿ္ဒဢ္၀ဲတဿ္သးအုးလဿယိၯစီၯပၯအဂီဿ္ခဲလဿာ္န႔ဢ္လီၯ. ယိၯစီၯပၯအံၯ တုၯ၀ံစံးဘဢ္ အီၯဒ္န႔ဢ္ တဘ်ီဃီ ဆိမိဢ္ထီဢ္၀ဲဒဢ္ တဿ္အံၯ ကဲထီဢ္လဿယမါလံ ယကဘဢ္မၯသံအီၯ ဒီးလုဿ္ ထီဢ္ကြံာ္အီၯန႔ဢ္ လဿယဂီဿ္ကမ့ဿ္တဿ္ဒ္လဲဢ္ဒီး တဿ္ကမၯအသးဒီးယၯ ဒ္လဲဢ္န႔ဢ္လီၯ. ယမ့ဿ္တ မၯဒ္န႔ဢ္ဘဢ္ ဒီးပာ္မူအီၯဘဢ္ဆဢ္ တမ့ဿ္လဿ တဿ္အဘ်ဳးအိဢ္စ့ဿ္ကီးဘဢ္. ယမ့ဿ္လုဿ္ထီဢ္ယထံ ယကီဿ္ဒီး ယပွၯကလုာ္မ့ဿ္အိဢ္မုာ္အိဢ္ခုဢ္က့ၯ လဿထံလီဿ္ကီဿ္ပူၯမုာ္မုာ္ခုဢ္ခုဢ္ဒီး မၯလဲၯထီဢ္ လဲၯထီက့ၯ ပထံပကီဿ္မ့ဿ္သ့န႔ဢ္ ကဂ့ၯဒိဢ္တက့ဿ္န႔ဢ္လီၯ. ဘဢ္ဆဢ္ဒီး ဒ္၀ံစံးဘဢ္ယၯအသိး တဿ္ခဲလဿာ္ မ့ဿ္ယမၯကမဢ္ပွၯ ကလုာ္ဂၯအဃိ၊ ယတသါပ့ၯနီဢ္ တဿ္မူးတဿ္ရဿ္တဖဢ္ဘဢ္ ယက က်ဲၯက့ၯအီၯ ဖဲတဿ္မုာ္တဿ္ခုဢ္ အိဢ္ ထီဢ္လဿယထံလီဿ္ကီဿ္ပူၯ၀ံၯ ကြဲးစ့ဿ္ကီးတဿ္စံဢ္စိၯတဲစိၯ တဖဢ္ ဒ္သိးခိဢ္နဿ္လဿကဟဲထီဢ္ပဿတဿ္လဿခံတဖဢ္ ကသ့ဢ္ညါ ထြဲ၀ဲအဂီဿ္ ဒီးပာ္ဒိဢ္ပာ္ကဲစ့ဿ္ ကီးပွၯကညီဖိတဖဢ္န႔ဢ္လီၯ. လံာ္တဿ္စံဢ္စိၯလဿယိၯကြဲးတ့ဿ္၀ဲဘဢ္ဃး ဒီးမုဿ္ယဲၯဖဲအဂ့ဿ္တဖဢ္ ခိဢ္နဿ္လဿအဟဲထီဢ္ပဿတဿ္လဿခံတဖဢ္ ထံဢ္ဘဢ္၀ဲ ဒီးမဲာ္ဆွးလီၯအသးအဃိ အဲဢ္ဒိးမၯလီၯ မဿ္ ကြံာ္၀ဲဒီး ဒြဲဢ္အူကြံာ္၀ဲဒဢ္ ခဲလဿာ္လံန႔ဢ္လီၯ.

ယိၯစီၯပၯအံၯတထံဢ္န႔ဿ္၀ဲ မုဿ္ယဲၯဖဲအတဿ္ကမဢ္လဿ အကမၯသံ၀ဲအဂီဿ္နီတမံၯဘဢ္၊ ဘဢ္ဆဢ္ ဒ္အမ့ဿ္တ့ဿ္ပွၯလဿအမၯကမဢ္တ့ဿ္လံ ပွၯကလုာ္ဂၯ တဂၯအသိး လဿအထံကီဿ္ကအိဢ္ဂဿဿ္ က်ဿၯဒီးဂုၯထီဢ္ပသီထီဢ္ အဂီဿ္ ကဘဢ္မၯခုဢ္လီၯက့ၯ၀ဲလဿ မုဿ္ယဲၯဖဲအသြံဢ္န႔ဢ္လီၯ. တဿ္န႔ဢ္ ၀ံၯအလီဿ္ခံ စီၯပၯအံၯလဲၯဆူမုဿ္ယဲၯဖဲအအိဢ္ဒီး တဲအဿ၀ဲဒဢ္မုဿ္ယဲၯဖဲ နၯအံၯနမ့ဿ္ပွၯလဿ အအဿတဂၯလီၯ. ပူၯကြံာ္နမၯသံနဖိခံဂၯညါအဃိ နမ့ဿ္ပွၯလဿအမၯကမဢ္ထံဧိၯကီဿ္ဧိၯတဂၯ လီၯ.

ခဲအံၯယကမၯသံနၯဒီး လုဿ္လီၯကြံာ္နၯလဿ ယထံလီဿ္ကီဿ္ပူၯအဃိ၊ နကစံးဒ္လဲဢ္. မုဿ္ယဲၯဖဲ တခီ အိဢ္ဒီးစီၯပၯဒီး မ့ဿ္တ့ဿ္၀ဲစီၯပၯအမါဖိသဢ္အံၯ ယံာ္တ့ဿ္လံ၀ဲအဃိ၊ တပ်ံၯလဿၯစီၯပၯ ဘဢ္ ဒီးစံး၀ဲ ခဲအံၯယအိဢ္ဒဢ္လဿစီၯပၯအစုပူၯဒီး ဖဲဒဢ္စီၯပၯဘဢ္အသးန႔ဢ္တဃ့ဿ္ပူၯယဲဒဢ္ နီတမံၯ ဘဢ္. ဘဢ္ဆဢ္ တခ်ဳးလဿစီၯပၯမၯသံယၯဒံးဘဢ္န႔ဢ္ယအဲဢ္ဒိးထံဢ္လိာ္ဒီးယဖါတံဿ္တစဲးအဃိ မ့ဿ္စီၯပၯမၯလိာ္န႔ဿ္ယၯကသ့စ့ဿ္ကီးဧါ. စီၯပၯတဲဆဿမုဿ္ယဲၯဖဲ ခဲအံၯဒ္တဿ္လဿနလိဢ္ဘဢ္အသိး ယမၯလဿပွဲၯန႔ဿ္နၯ သ့ကစီဒီ ဒီးတဿ္လဿနလိဢ္ဘဢ္အဂၯတဖဢ္ စ့ဿ္ကီး မ့ဿ္အိဢ္န႔ဢ္ဒုးသ့ဢ္ညါ ဘဢ္ယၯ ယကမၯလဿပွဲၯန႔ဿ္နၯခဲလဿာ္န႔ဢ္လီၯ. တဘ်ီဃီ ယိၯစီၯပၯအံၯမၯလိာ္မုဿ္ယဲၯဖဲအဖါတံဿ္ အိဢ္လဿဖ်း ခိဢ္ ဟဲလီၯတုၯလီၯ၀ဲ ဒီးယိၯစီၯပၯတဲဘဢ္မုဿ္ယဲၯဖဲ ခဲအံၯနဖါတံဿ္ဟဲတုၯလံ၊ မ့ဿ္နကစံးဘဢ္အီၯဒ္လဲဢ္ ဖဲနအဲဢ္ဒိးတဲအီၯတဿ္ဂ့ဿ္န႔ဢ္ တဲဘဢ္အီၯ ဒီးဖဲနအဲဢ္ဒိးမၯလိာ္တဿ္တမံၯန႔ဢ္ မၯလိာ္အီၯတက့ဿ္. မ့ဿ္တဿ္ ဆဿကတီဿ္လဿနဂီဿ္ ဒီးဖဲနအဲဢ္ဒိးစံးဘဢ္အီၯ တဿ္တမံၯလဿ္လဿ္န႔ဢ္ နစံးဘဢ္အီၯသ့န႔ဢ္လီၯ.

 တုၯႏုၯတစု မုဿ္ယဲၯဖဲကိးဃီၯအဖါတံဿ္ ဒီးယိၯစီၯပၯလဿ ကဘဢ္ဟဲဆူအအိဢ္ ဒီးစံးဘဢ္အဖါ တံဿ္၊ တံဧဿ အခဲအံၯ ယိၯသ့ဢ္တဖဢ္ကမၯသံယၯ ဒီးကလုဿ္လီၯကြံာ္ယၯလဿအထံအကီဿ္အ ဂီဿ္ အဃိ ခဲအံၯယမၯလိာ္နၯ ဒ္သိးယကမၯတဿ္အဿဢ္လီၯအီလီၯ လဿယိၯဒီးသု၀ဲပွၯကညီတဖဢ္ လဿမဲာ္သကိးမဲာ္ လဿခါဆူညါတဿ္ကမၯအသး တဖဢ္အဂီဿ္န႔ဢ္လီၯ. ဖဲန႔ဢ္ မုဿ္ယဲၯဖဲ တဲဘဢ္ယိၯ စီၯပၯ ခဲအံၯဘီဢ္လီၯကြံာ္စီၯပၯအကူအသိးလဿ အအိဢ္လဿနလိၯ ဒီး စံဢ္လီၯကြံာ္လဿစီၯပၯအ လီဿ္ဆ့ဢ္နီၯခိဢ္ ဒီးဟ့ဢ္လီၯယၯလဿစီၯပၯအကူအသိးတဖဢ္န႔ဢ္ခဲလဿာ္တက့ဿ္.

စီၯပၯတခီ ဒ္အလုဿ္အလဿ္အိဢ္၀ဲဒဢ္အသိး ကလုဿ္တထံဢ္ခီဢ္လီဿ္တဆူ၊ အီထီဢ္တထံဢ္မ့ဿ္လဿဿ္ က်ဿဿ္လီၯတထံဢ္မ့ဿ္လ့ အသိး တဿ္ကလုဿ္မ့ဿ္ဂ့ၯ၊ တဿ္စံးကတိၯတမံၯလဿ္လဿ္မ့ဿ္ဂ့ၯ၊ တုၯအဟး ထီဢ္လဿအထးခိဢ္လံန႔ဢ္ ထုးကြံာ္၀ဲတသ့လဿၯဘဢ္၊ တထံဢ္ဒီးမ့ဿ္တထံဢ္န႔ဢ္လီၯ. မ့ဿ္လဿစီၯပၯအဿဢ္လီၯတ့ဿ္မုဿ္ယဲၯဖဲလဿ နကဘဢ္တဿ္လုဿ္လီၯနၯအဃိ၊ ဖဲတဿ္လိဢ္အိဢ္ဒီးနၯ တဖဢ္ တဲဘဢ္ယၯယကမၯလဿပွဲၯန႔ဿ္နၯခဲလဿာ္အသိး၊ စီၯပၯအံၯဂ့ဿ္လိာ္တဿ္တသ့လဿၯဘဢ္ ဒီးဘဢ္ဟ့ဢ္လီၯကြံာ္ စီၯပၯအကူအသိး တဖဢ္ဆူ မုဿ္ယဲၯဖဲ ဒီးဘဢ္စံဢ္လီၯကြံာ္လဿလီဿ္ဆ့ဢ္နီၯ ဖီခိဢ္ကစုဒုန႔ဢ္လီၯ. မုဿ္ယဲၯဖဲကၯထီဢ္စီၯပၯအတဿ္ကူတဿ္သိး လဿစီၯပၯဟ့ဢ္လီၯအီၯတဖဢ္၀ံၯ ထီဢ္ဆ့ဢ္နီၯလဿစီၯပၯအလီဿ္ဆ့ဢ္နီၯဖီခိဢ္ ဒီးကိးဃီၯ၀ဲအဖါတံဿ္ ဒီးအသကိးတဖဢ္၀ံၯ ကိးဃီၯ ကဒီးယိၯစီၯပၯ ဃုာ္ဒီးအခ့အပွၯတဖဢ္တနီၯ၀ံၯ မဿ၀ဲပွၯခဲလဿာ္ဆ့ဢ္နီၯလဿအမဲာ္ညါန႔ဢ္လီၯ. မုဿ္ယဲၯဖဲတဲဘဢ္အဖါတံဿ္ နၯဒီး နတံၯသကိးတဖဢ္ဆ့ဢ္နီၯလဿစုထြဲတခီ မ့မ့ဿ္စီၯပၯဒီးအခ့အပွၯ တဖဢ္ဆ့ဢ္နီၯလဿစုစ့ဢ္တကပၯ၀ံၯ တဲထီဢ္၀ဲ ခဲအံၯ ယိၯဒီးပွၯကညီ ကဘဢ္မၯတဿ္အဿဢ္လီၯ အီလီၯလီၯတံဿ္လီၯဆဲး ဒ္သိးဆူမဲာ္ညါ တဿ္စံးအါကတိၯအါ၊ တဿ္အ့ဢ္လိာ္ဆိးက့လိာ္ သုတအိဢ္ တဂ့ၯအဂီဿ္န႔ဢ္လီၯ. မုဿ္ယဲၯဖဲအတဿ္စံဢ္ညီဢ္ဒီး တဿ္အဿဢ္လီၯအခီဢ္ထံး လဿယိၯစီၯပၯ ဒီးပွၯ ကညီဖိအဂီဿ္ မုဿ္ယဲၯဖဲစံး၀ဲ -
စီၯပၯဧဿ၊ ခဲအံၯနကလုဿ္လီၯကြံာ္ယၯလဿနထံနကီဿ္အဂီဿ္ ဒ္သိးနကသူဢ္ထီဢ္နဘီနမုဿ္ ဒီးနက အိဢ္ဂဿဿ္အိဢ္က်ဿၯ တစိၯဘဢ္တစိၯ လဿယဃိလီၯ. မုဿ္ကအိဢ္၀ဲတနံၯ ပွၯကညီဖိတဖဢ္ မ့ဿ္ဘဢ္နးဘဢ္ဖွီဢ္၊ မ့ဿ္ဘဢ္ကီဘဢ္ခဲ တုၯလဿအိဢ္ဆိးလဿအထံအကီဿ္မ့ဿ္တသ့ ဘဢ္န႔ဢ္ အ၀ဲသ့ဢ္ ကဘဢ္ဟဲအိဢ္ကဒုလဿမုဿ္ထီဢ္တခီ ဒီးကအိဢ္ဆိးလဿသုထံလီဿ္ကီဿ္ပူၯမီကံဿ္မီကိာ္န႔ဢ္ လီၯ. ဖဲသုထံဢ္ပွၯကညီတဖဢ္ဟဲအိဢ္ဟဲဆိးလဿ သုထံလီဿ္ကီဿ္ပူၯလံန႔ဢ္ သုထံသုကီဿ္အံၯ ကလဲၯထီဢ္လဲၯထီ၀ဲ ဘဢ္ဆဢ္၊ သုတဘဢ္ကြဿ္တလီၯပွၯကညီဖိ တဖဢ္ဘဢ္၊ မုဿ္တနံၯတဿ္ကမၯ အသးဒီးသု လဿတဖ်းမဲာ္အတီဿ္ပူၯ ဒီးသုကဘဢ္က့ၯသန႔ၯထီဢ္က့ၯသုသး လဿပွၯကညီဖိတဖဢ္ သပွဿ္တဿဿ္န႔ဢ္လီၯ.

လဿတဿ္န႔ဢ္အဃိ၊ မုဿ္ယဲၯဖဲစံး၀ဲ တဿ္ကတိၯလဿယိၯအဂီဿ္ -
၁. ပွၯကညီဖိတဖဢ္အံၯသုကဘဢ္အဲဢ္အီၯကြံအီၯ
၂. သုကဘဢ္တူဿ္လိာ္အီၯလဿသုထံလီဿ္ကီဿ္ပူၯ
၃. သုကဘဢ္တိစဿၯမၯစဿၯကဟုကယာ္အီၯ
၄. သုတဘဢ္မၯအဿမၯသီအီၯဘဢ္
၅. သုတဘဢ္ဃုတဿ္အ့ဢ္လိာ္ဆိးက့လိာ္ဒီးအီၯဘဢ္
၆. သုတဘဢ္ဒုးအီၯယၯအီၯဘဢ္
၇. သုတဘဢ္ကူဢ္အဿကူဢ္သီအီၯ ဒီးထီဒါခူသူဢ္အီၯလ့ၯတက့ၯဘဢ္.

တဿ္ကတိၯတဖဢ္အံၯ မ့ဿ္၀ဲယမၯတဿ္အဿဢ္လီၯအီလီၯဒီးသု လဿယဖါတံဿ္အမဲာ္ညါ ဒ္သိး ယဖါတံဿ္ကသ့ဢ္ညါ၊ ထံဢ္ဘဢ္၊ ဒီးနဿ္ဟူဘဢ္၀ဲ လီၯတံဿ္လီၯဆဲး ဒီးက့ၯဒုးသ့ဢ္ညါ ဘဢ္က့ၯ ဖိလံၯလဿ အကဟဲလဿခံတစိၯဘဢ္တစိၯအဂီဿ္၊ လဿယိၯဒီးပွၯကညီအဘဿဢ္စဿၯ တဿ္မၯ အသးတဖဢ္န႔ဢ္လီၯ. ပွၯသူဢ္က့သးပွဿ္လဿပ်ဿၯတဖဢ္ မ့ဿ္ပွၯလဿအတီဒီးအကလုဿ္ တီဒီး တဿ္ အဿဢ္လီၯတဖဢ္န႔ဢ္လီၯ. အ၀ဲသ့ဢ္မ့ဿ္မၯတဿ္အဿဢ္လီၯအီလီၯတမံၯလဿ္လဿ္ ခီဖ်ိလဿတဖံးလိ မၯလိဘဢ္တဿ္ ဒီးကြဲးလံာ္ဖးလံာ္တဘဢ္ဘဢ္အဃိ၊ ဟံးဃာ္က်ဿၯဒဢ္ထဲ အတဿ္အဿဢ္လီၯအီ လီၯ၊ အတဿ္ကတိၯတဖဢ္ လဿအ၀ဲသ့ဢ္ဟ့ဢ္လိာ္အသးတဖဢ္ဃံးဃံးန႔ဢ္လီၯ.

ယိၯစီၯပၯစံး၀ဲ -
ယိၯစီၯပၯအံၯအဿဢ္လီၯ၀ဲမုဿ္ယဲၯဖဲ ႃႃမ့ဿ္၊ ဒ္မုဿ္ယဲၯဖဲဘဢ္သးအသိးန႔ဢ္ ယကမၯလဿပွဲၯယဲ ခဲလဿာ္န႔ဢ္လီၯ.႗႗
မုဿ္တနံၯပွၯကညီတဖဢ္ အိဢ္ဆိးလဿအထံလီဿ္ကီဿ္ပူူၯ မ့ဿ္တသ့ဘဢ္န႔ဢ္ ကဟဲအိဢ္ဒဢ္၀ဲလဿ ယထံလီဿ္ကီဿ္ပူၯ ယကတူဿ္လိာ္အီၯဂ့ၯဂ့ၯ ယကအံးထြဲကြဿ္ထြဲအီၯ တကးဘဢ္ ယဖိယလံၯ လဿ ကဟဲလဿခံတဖဢ္စ့ဿ္ကီး ယကမၯလိာ္ပိာ္လီၯအီၯ အိဢ္ဒီးတဿ္ကြဲးနီဢ္ကြဲးဃါ လီၯတံဿ္လီၯဆဲး ဒီး ကဘဢ္ လူၯထြဲမၯထြဲ ၀ဲဒ္ ယတဿ္အဿဢ္လီၯဒီး ယတဿ္မၯလိာ္ပိာ္လီၯအသိး ကိးဂၯဒဲးကိးစိၯဒဲး စ့ဿ္ကီးန႔ဢ္လီၯ.

ဖဲန႔ဢ္မုဿ္ယဲၯဖဲတဲဘဢ္ကဒီးအဖါတံဿ္၊ ႃႃတံဧဿ၊ ခဲအံၯ ယိၯစီၯပၯအဿဢ္လီၯတဿ္ဒီးယၯလံအဃိ၊ မုဿ္တနံၯသုအိဢ္သုဆိးလဿသုထံသုကီဿ္ပူၯမ့ဿ္တညီဘဢ္န႔ဢ္ ဟဲစံဢ္ဃီၯအိဢ္ကဒုလဿကီဿ္ကႜီဢ္ တဲဢ္ အပူၯတက့ဿ္ အ၀ဲသ့ဢ္မ့ဿ္တတူဿ္လိာ္သုဘဢ္မ့ဿ္ဂ့ၯ၊ မ့တမ့ဿ္တူဿ္လိာ္သုလံဘဢ္ဆဢ္၊ မ့ဿ္မၯ အဿမၯသီသု မ့ဿ္ကူဢ္အဿကူဢ္သီသုန႔ဢ္ တဘဢ္ပ်ံၯအီၯတဂ့ၯ သ့ဢ္နီဢ္ထီဢ္ဘဢ္ယတဿ္မၯလိာ္ ဒီးဂဲၯဆဿထဿဢ္ဒုးတဘ်ီဃီတက့ဿ္ ဂီၯမုဿ္ထူဢ္တအိဢ္ဘဢ္ အခူကလူၯ၀့ဿ္ကလူၯခဲလဿာ္ ဒီးကနး န႔ဿ္သု သဿဘ်ီဒံးညါန႔ဢ္လီၯ. သုမ့ပ်ံၯအီၯဒီးအိဢ္ဒဢ္ ကစုဒုနာ္က့ လဿအ၀ဲသ့ဢ္အဂီဿ္ တဿ္ကီတဿ္ ခဲလဿအဒိဢ္ဒိဢ္မုဿ္မုဿ္တဖဢ္ ကဟဲတုၯအိဢ္ဒဢ္အီၯ လဿအထံလီဿ္ကီဿ္ပူၯ တမံၯ၀ံၯတမံၯ ကြ႔ဿ္ကြ႔ဿ္ ကိဿ္ကိဿ္ဂီၯဂီၯ တုၯဒဢ္လဲာ္ ဘွါလီၯ၀ဲ တန႔ဿ္ဘဢ္န႔ဢ္လီၯ. အ၀ဲအံၯမ့ဿ္ယတဿ္ဆိဢ္ဃီဢ္ ပာ္လီၯလဿနၯဒီးယိၯစီၯပၯအမဲာ္ညါ လဿယိၯဒီး ပွၯကညီ တဖဢ္အဘဿဢ္စဿၯန႔ဢ္လီၯ.႗႗